Американскиот претседател Доналд Трамп изјави дека „100 проценти“ ќе ги реализира своите закани за воведување дополнителни царини доколку не постигне договор за Гренланд, зголемувајќи ги тензиите меѓу САД и нивните сојузници, објави „Би-би-си“.

На прашањето дали би употребил сила за да го преземе островот, Трамп одговори со „без коментар“.

Неговите изјави доаѓаат во период кога во јавноста беа објавени пораки што му ги испратил на норвешкиот премиер, во кои наведува дека фактот што не ја добил Нобеловата награда за мир значи дека повеќе нема „обврска да размислува исклучиво во насока на мир“.

Трамп со порака до норвешкиот премиер: Не ми ја дадовте Нобелова награда, не сум должен да размислувам за мирот

Премиерот на Гренланд остро реагираше на ваквите пораки, истакнувајќи дека земјата нема да попушти под притисок.

– Нема да дозволиме да бидеме притиснати. Најновите изјави од САД, вклучително и заканите со царини, не ја менуваат нашата позиција – порача тој.

За време на викендот, Трамп најави дека од февруари ќе воведе царина од 10 проценти на увоз на стоки од осум земји-членки на НАТО, доколку тие се спротивстават на неговиот предлог за преземање на Гренланд.

Според неговите зборови, доколку отпорот продолжи, царините би можеле да се зголемат на 25 проценти до јуни.

Реакции пристигнаа и од Велика Британија. Британската министерка за надворешни работи, Ивет Купер, во обраќање пред Парламентот изјави дека заканите за воведување царини против сојузнички земји се „целосно погрешни“, предупредувајќи дека ваквиот пристап може дополнително да ги наруши односите меѓу партнерите во НАТО.

Ситуацијата околу Гренланд, кој има стратешко значење поради својата географска положба и природни ресурси, повторно ја отвори дебатата за границите на американската надворешна политика и за односите со традиционалните сојузници.

Данска го бојкотира форумот во Давос