Полицајци и пожарникари попладнево спасиле шестмина патници во автомобил кој излетал од автопатот Скопје-Велес кај месноста „Манастири“, соопшти МВР.

„Веднаш по пријавата, на местото на несреќата биле испратени полициски екипи, кои на тешко достапен терен го пронашле излетаното патничко возило „Сеат“, управувано од К.С. (68) од Велес. Во автомобилот имало уште пет сопатници. Во спасувачката акција се вклучиле и една екипа на Територијалната противпожарна бригада на град Скопје, три екипи на Итната медицинска помош од Скопје и една екипа на ЈП Македонија Пат. Благодарение на брзата и координирана реакција на службите, возачот и сопатниците биле успешно извлечени од возилото и пренесени во Ургентниот центар во Велес. Според првичните информации, сите се надвор од животна опасност“, пишува во полициското соопштение.

Увид на местото на несреќата извршила екипа од СВР Скопје.