Секоја земја има свој препознатлив десерт, во Франција тоа е чоколадниот мус, во Италија тирамису, а во Турција баклава. Но, ако им се верува на оценките на глобалниот гастрономски портал „Тејст атлас“, еден десерт ги надминува сите останати.

Според нивната листа на најдобри десерти во светот, првото место не го зазема сладолед или крем бруле, туку пастел де Белем, а веднаш зад него е многу сличниот пастел де ната. Двете слатки потекнуваат од Португалија – мали тартови од лиснато тесто со кремаст фил од јајца – и со текот на времето го освоија целиот свет.

 

View this post on Instagram

 

A post shared by Tasca Ibérica | Comida Portuguesa (@tasca_iberica)

Разликата меѓу нив е во потеклото. Пастел де Белем е оригиналната верзија од истоимената лисабонска населба и е тесно поврзана со традиционална пекарница во близина на манастирот Жеронимуш, каде што десертот се подготвува според таен рецепт стар уште од 1837 година.

Од друга страна, пастел де ната е општ назив за сите други верзии на овој десерт, кои денес може да се најдат ширум светот или да се подготват и во домашни услови.

Она што ги прави овие тартови толку неодоливи е контрастот меѓу крцкавото лиснато тесто и нежниот кремаст фил од јајца. Внатрешноста останува мека и лесно подвижна, додека на површината се создаваат темни карамелизирани дамки.

Најчесто се сервираат топли, посипани со цимет и шеќер во прав – едноставно, но совршено. Токму таа специфична текстура е причината поради која многу имитации не успеваат целосно да го достигнат вкусот на оригиналот.