Таткото на Леонид денеска ја обжали одлуката на Првостепената комисија на ФЗОМ
Таткото на Леонид, Бранко Индов денеска до Фондот за здравство поднесе жалба против одлуката на првостепената лекарска комисија при ФЗОМ која го одби лекувањето на неговиот син во странство со образложение дека не било лекување туку рехабилитација.
Сега второстепената комисија при ФЗОМ ќе одлучува за судбината на Леонид кој се наоѓа во центар за рехабилитација во Австрија.
Од Фондот за здравство се правдаа дека од ТОАРИЛУЦ каде Леонид се лекувал, не испратиле точна интервенција која ќе му се спроведува во странство. Така семејството остана извисено за 140 илјади евра и парите ги собира преку донации и смс пораки.
Во конзилијарното мислење за Леонид е наведено дека во земјавава се исцрпени сите опции за лекување и дека поради тоа се упатува на лекување во Австрија. И покрај тоа, првостепената лекарска комисија при Фондот одбила да го покрие трошокот.
Од ФЗОМ на брифингот со новинарите минатата недела не знаеа да кажат во која здравствена установа Леонид би можел да се лекува во Макеоднија. Тој откако се здоби со тешки телесни повреди на одмор во Грција, покрај тоа што не може да се движи, исто така дише на респиратор.