Македонската А репрезентација денеска од 20.45 часот на домашен терен ќе го игра последниот натпревар од групната фаза во Лигата на нации против Бугарија.

И двете селекции ги загубија шансите за првото место, но е важен мечот за нас со позитивен резултат да бидеме во четвртиот шешир пред жрепката за квалификациите за ЕП 2022 на 9 октомври.

Дарко Тасевски (38) за нашата сениорска селекција запиша вкупно 45 настапи и еден погодок.

Во клупската кариера играше и во Бугарија за екипите на Левски Софија и Славија Софија со над 200 одиграни натпревари во таа земја. Со Левски Софија беше шампион во бугарското првенство во 2009 година, а во 2007 и 2009 со истиот клуб стигна до трофејот во националниот Суперкуп.

Екс играчот за врска во нападот ги сподели очекувањата во пресрет на вечерашниот дуел на Националната арена „Тодор Проески“.

– Бугарија одигра добро против Гибралтар и позитивна работа е што дадоа „знаци на живот“, но да не брзаме да го наречеме тоа чудо, бидејќи на крајот на краиштата зборуваме за Гибралтар. Можете да ја видите промената, репрезентацијата се движи во друга насока, Крстајиќ е тренер со многу искуство и доколку остане подолго може да го води тимот во вистинската насока и да се искористи потенцијалот – вели Тасевски.

Тасевски смета дека поразот на Македонија од Грузија во Тбилиси беше очекуван (2:0).

– Поразот од Грузија беше очекуван. Македонија има благ пад во составот во целост. Ентузијазмот што беше во селекцијата пред ЕП, плеј-офот, го нема…Многу од играчите сега не играат редовно и сето ова има големо влијание – се зборовите на Тасевски.