Препознатлива по својата енергија, сценска свежина и постојана љубопитност кон уметноста, македонската актерка Тања Кочовска денеска го слави својот 58. роденден. Родена на 21 јануари 1967 година во Скопје, Кочовска повеќе од три децении е едно од најпрепознатливите и најпосветените лица на македонската театарска и телевизиска сцена.

Дипломира актерска игра на Факултетот за драмски уметности во Скопје, во класата на проф. Љубиша Георгиевски, а нејзиниот професионален пат започнува во Драмски театар, Скопје. Веќе во 1993 година таа станува дел од Театарот за деца и младинци, создавајќи низа незаборавни улоги за најмладата, но и за возрасната публика.

Од 2017 година, Кочовска е членка на ансамблот на Македонскиот народен театар, каде што продолжува со со низа актерски остварувања.

Нејзината кариера е исклучително богата, од класичен и современ драмски репертоар, преку мјузикли, до куклен и детски театар, каде што со подеднаква сериозност и страст им пристапува на сите жанрови. Последните години се истакнува со улоги во значајни проекти како „Народен пратеник“, „Горчливите солзи на Петра фон Кант“, „Ангели во Америка“, како и во сценскиот спектакл „Сонцето, колку е блиску сонцето“, со што уште еднаш ја потврдува својата сценска моќ.

Покрај театарот, таа има и впечатлива телевизиска и филмска кариера. Публиката особено ја засака преку серијата „Преспав“, каде што со топлина и хумор создаде лик што стана дел од секојдневието на гледачите.

Нејзината работа е наградена со бројни признанија, од актерски награди на домашни и меѓународни фестивали, до признанијата од публиката, како „Златна бубамара на популарноста“. Но, можеби најголемото признание е континуираната љубов од публиката и почитта од колегите, кои ја препознаваат како актерка со исклучителен интегритет, дисциплина и човечка топлина.

На својот 58. роденден, Тања Кочовска останува симбол на истрајност, љубов кон професијата и уметничка искреност. Нејзината кариера е доказ дека вистинската уметност не познава замор, туку само нови предизвици и нови приказни што чекаат да бидат раскажани.

Филмографија:

1988 Ел камино дел сур ТВ-филм
1990 Македонски народни приказни ТВ-серија
1992 Еурека ТВ-серија
1993 Светло сиво ТВ-филм
1999 Во светот на бајките ТВ-серија
2001 Светот има осум страни ТВ-серија
2001 Во светот на бајките ТВ-серија
2002 Наше маало ТВ-серија
2003 Битолски лакрдии ТВ-серија
2011 Трето па машко ТВ-серија
2018 Година на мајмунот ТВ-филм
2018-2021 Преспав ТВ-серија
2022 Тин Камп ТВ-серија
2024 Убиј ги прво децата ТВ-филм
2025 Бунтовната Принцеза ТВ-филм
2025 Нема да ви се верува што се случи претходно ТВ-филм

ТВ серии:

Стојна (Преспав, 2018);
(Трето па машко, 2011);
(Битолски лакрдии, 2003);
Кармен (Наше маало, 1999 – 2004);
(Во светот на бајките, 1999);
(Еурека, 1992);
(Македонски народни приказни, 1990).

Награди:

Специјалната Стериина награда за колективна актерска игра на ансамблот на претставата „Народен пратеник“ од Бранислав Нушиќ, во режија на Егон Савин, а во продукција на Македонскиот Народен Театар – 2025 година;
Награда за актерка за 2019 година на манифестацијата „Златна бубамара на популарноста“;
Награда за актерско мајсторство на кукла во претставата „Петар Пан“ на меѓународен куклен фестивал, Подгорица, 2017 г.;
Награда за актерка на 2015 г. на манифестацијата „Златна бубамара на популарноста“;
Колективна награда за актерско остварување во претставата „Бескрајни соништа“ на меѓународниот куклен фестивал „Златна искра“, Крагуевац 2014 г.;
Награда за актер во улогата на Тетка Ема и Злобната вештерка во претставата „Волшебникот од Оз“ и награда за најдобра претстава на меѓународниот куклен фестивал за деца Суботица, 2013 г.;
Колективна награда за актерско остварување во претставата „Волшебникот од Оз“ на меѓународниот куклен фестивал за деца Суботица, 2012 г.;
Гран при за претставата „Девојчето со ќибритчиња“ на фестивалот на театри за деца Котор, Црна Гора, 2008 г.;
Колективна награда за актерско остварување во претставата „Телефонот“ на фестивалот на театри за деца Котор, Црна Гора, 2008 г.;
Клективна награда за актерско остварување во претставата „Попот и неговиот селски слуга Будал“ на фестивалот на театри за деца Котор, Црна Гора, 2007 г.;
Награда за актер за остварена улога во претставата „Македонска приказна“ и за најдобра претстава на меѓународниот фестивал на театри за деца Бања Лука, Република Српска, 2002 г.;
Награда за актер во улогата на Бојанка во претставата „Чук чук Стојанче“ на меѓународниот фестивал на театри за деца Бања Лука, Република Српска, 2002 г.;
Колективна награда за актерско остварување во претставата „Македонска приказна“ на меѓународниот куклен фестивал за деца, Суботица 2000 г.;
Награда за најдобро актерско остварување за улогата на Скакулка во претставата „Убавицата и ѕверот“ на меѓународниот куклен фестивал за деца, Суботица 2000 г.