Косовскиот претседател Хашим Тачи изјави дека на денешната средба со специјалниот пратеник на Европската Унија (ЕУ) за дијалогот меѓу Приштина и Белград, Мирослав Лајчак станало збор за можноста за постигнување на конечен договор меѓу Косово и Србија, што би подразбирал и меѓусебно признавање на двете држави.

Во неговото обраќање пред медиумите по средбата со Лајчак, Тачи го повика Брисел „да го изнесе на маса договорот за меѓусебно признавање на Косово и Србија“ и „да не продолжува со техничкиот дијалог”.

– Имавме коректна и конструктивна средба, отворен и пријателски разговор во правец на изнаоѓање можности за постигнување на конечен договор меѓу Косово и Србија, што би подразбирал меѓусебно признавање како две независни држави и со можност Косово да се зачлени во ООН. Јас цврсто верувам дека иднината на Косово е членството во НАТО и во ЕУ. Исто така цврсто верувам дека е дојдено време ЕУ да го изнесе на маса договорот за меѓусебно признавање и да не продолжува со техничкиот дијалог, изјави Тачи.

Според косовскиот претседател, „меѓусебното признавање е единствената можност која гарантира стабилност во регионот и добрососедски односи меѓу државите”.

Лајчак престојува во дводневна официјална посета на Приштина, каде што вчера се сретна со премиерот Авдула Хоти и со претседателката на Собранието на Косово, Вјоса Османи. По приемот кај Тачи, за денеска се предвиени средби со лидерите на најголемите политички партии од власта и опозицијата.

Според најавите од Брисел, по завршувањето на посетата на Приштина, Лајчак ќе отпатува во официјална посета на Белград.