Светската ѕвезда Емили Вотсон ќе го добие Почесното срце на Сараево
Британската актерка Емили Вотсон е годинашната добитничка на Почесното срце на Сараево за нејзиниот извонреден придонес во филмската уметност, објави Бета.
Препорачано
Наградата ќе ѝ биде доделена во август на Филмскиот фестивал во Сараево, на кој таа ќе претседава со жирито на натпреварувачката програма.
„Актерка чиј талент, сензибилитет и посветеност на глумата оставија длабока трага во современата кинематографија, во текот на својата извонредна кариера ги освои публиката и критичарите со силни, емотивни и автентични интерпретации. Верувам дека филмските автори од овогодинешната програма ќе бидат возбудени како и ние за фактот дека токму таа ќе ги гледа нивните филмови во Сараево“, рекол директорот на фестивалот Јован Марјановиќ.
Вотсон двапати беше номинирана за Оскар, а во 2015 година беше одликувана со Ред на Британската Империја во чин офицерка за нејзиниот придонес во драмските уметности.
Публиката неодамна можеше да ја види Вотсон во улогата на Мери Шекспир во филмската адаптација на романот „Хамнет“ од писателката Меги О’Фарел, во режија на оскаровката Клое Жао. Филмот ја освои наградата БАФТА за најдобар британски филм и наградата Златен глобус за најдобра драма, како и наградата од публиката на Филмскиот фестивал во Торонто и наградата од публиката за најдобар долгометражен филм на Лондонскиот филмски фестивал БФИ.
Вотсон играше и една од главните улоги во серијата на Ејџ-би-о „Дина: Пророштвото“, чие снимање на втората сезона беше неодамна завршено.
Меѓу нејзините филмски улоги се „Прекршувајќи ги брановите“ на Ларс фон Трир, „Божји суштества“ со Пол Мескел, „Тие ситници“ со Килијан Мерфи, за што ја освои Сребрената мечка за најдобра споредна женска улога на Берлиналето, потоа филмот „Стив“ на Нетфликс, како и „Легендата за очите“, во кој глуми со Вилем Дефо, Фин Волфхард и Хелена Ченгел. Таа, исто така, играше во продукцијата на „Крал Лир“ на Би-би-си, режирана од Ричард Ејр.
Листата на филмови во кои учествувала ги вклучува и „На плажата Чесил“, „Хилари и Џеки“, „Паркот Госфорд“, „Пијана од љубов“, „Црвен змеј“, „Крадачка на книги“, „Сведоштво за младоста“, „Еверест“, „Теоријата за сè“, „Ана Каренина“, „Бел“, „Госпоѓица Потер“, „Мртвата невеста“, „Прашината на Анџела“, „Боксер“, „Метроленд“.
На телевизија, таа играше во сериите „Чернобил“, „Гардеробер“, „Слепа улица“, мини-серијата „Премногу блиску“, серијата „Трет дан“, како и во серијата „Гениј“, за која беше номинирана за Еми.
Емили Вотсон има и богата театарска кариера. Во 2002 година, таа ги играше главните улоги во претставите „Чичко Вања“ и „На три кралеви, или како сакате“.
Минатата година ја освои наградата „Ричард Харис“ на Британските независни филмски награди (БИФА). Таа ја освои и почесната награда „Џозеф Плато“ на Филмскиот фестивал во Гент (2024), наградата за животно дело на Филмскиот фестивал во Сан Себастијан (2015), како и наградата БАФТА за најдобра актерка во 2011 година за филмот „Медијаторка“.
Нејзината улога во „Кршејќи ги брановите“ ѝ ја донесе Европската филмска награда за најдобра актерка, како и номинации за Оскар, Златен глобус и БАФТА.
Триесет и второто издание на Филмскиот фестивал во Сараево ќе се одржи од 14 до 21 август.
Режисерот Паоло Сорентино е овогодишен добитник на „Почесно срце на Сараево“
