Тим научници временски одреди една од најголемите соларни бури што ја погодила Земјата во 664 п.н.е., што би можело да биде навремено предупредување откако поларната светлина оваа година беше забележана значително подалеку на југ од вообичаеното, а Сонцето влезе во периодниот соларен максимум.

Научниците од Универзитетот во Аризона ја опишаа бурата што ја погодила Земјата со соларна радијација толку интензивна што денес би ја нарушила „електричната мрежа, сателитите и комуникациските мрежи ширум светот“, пишува агенцијата Dpa.

Бурата од 664 п.н.е. била значително поинтензивна од таканаречениот настан на Карингтон во 1859 година, кога Земјата за време на соларниот максимум била погодена од коронални исфрлања, што било забележано од страна на аматерскиот британски астроном по кого настанот го доби името.

Поларната светлина тогаш била видлива во тропските предели, а поради неа луѓето на северната хемисфера можеле да читаат и ноќе, пишува Dpa. Меѓутоа, тој настан ја „испржил“ тогашната технологија, пред сè телеграфите. Денес поради тоа би требало да бидат приземјени сите летови, а електричните мрежи во светот и поврзаната инфраструктура би морале да бидат исклучени како мерка на претпазливост.

Ова би се постигнало во најдоброто сценарио, во кое човештвото успешно предвидува кога ќе се случи ваква соларна бура. Фатен во заседа, светот би бил во голема неволја, дури и кога бурата би била многу помалку интензивна од онаа од минатата ера.