Судир на фаворитите во Минхен, Швајцарците подготвуваат нова сензација
Денеска се играат првите два четвртфинални натпревари на ЕП, Швајцарија – Шпанија и дербито во оваа фаза помеѓу Белгија и Италија.
Дербито на четврфиналето на Евро 2020 ќе се игра вечерва (21 часот) во Минхен, каде ќе се сретнат едни од најголемите фаворити за трофејот, Белгија и Италија.
Белгијците беа меѓу главните фаворити и пред почетокот на Евро 2020, додека Италијанците израснаа во фаворити со одличните игри во групната фаза и го натераа фудбалскиот свет повторно да им се воодушевува.
„Аѕурите“ предводени од селекторот Роберто Манчини врзаа серија од 31 натпревари без пораз, но вечерашниот дуел против талентираниот состав на Белгија која има фантанстични фудбалери ќе биде нивниот најголем тест во последните неколку години.
И двете репрезентрации во групната фаза остварија максимални три победи, но во осминафиналето покажаа дека се ранливи, Италија ја победи Австрија со 2:1 по продолеженијата, но во регуларните 90 минути ВАР два пати ги спаси „аѕурите“.Од друга страна Белгија ја совлада Португалија со 1:0, но по повредата на Кевин де Брујне, не беше доминантна, напротив Португалците го диктираа ритамот но не успеаја да постигнат гол.
Дополнителен проблем за селекторот на Белгија, Роберто Мартинез претставува податокот што двајцата клучни играчи, Еден Азар и Кевин де Брујне имаат проблеми со повредите и сигурно нема да можат да го дадат максимумот доколку се најдат на теренот на Арената во Минхен.
– Можно е поради нашето отсуство од големите натпреварувања, Белгија да е поискусна од нас, но ние сме оптимисти. Знаеме дека тие се прва репрезентација според рејтингот на ФИФА, а тоа доволно зборува за нивниот потенцијал. Ќе бидеме претпазливи, но нема да се откажеме од нашата игра која ни носи резултат – вели напаѓачот на Италија, Чиро Имобиле.
Од друга страна, во таборот на Белгија, сите мисли се насочени кон Азар и Де Брујне, односно дали ќе бидат подготвени за настап.
– Наш единствен проблем е што натпреварот ни доаѓа многу брзо, па не сме сигурни дека Де Брујне и Азар ќе бидат подготвени. Тие избегнаа потешки повреди и се надеваме дека ќе бидат подготвени за настап. Тоа што го знаеме е дека Италија е најдобра екипа на Евро 2020, не очекува одличен натпревар и голема борба на две фантастични селекции – изјави селекторот на Белгија, Роберто Мартинез.
Во првото четвртфинале кое ќе се игра во Санкт Петербург (18 часот) Шпанија ќе игра против селекцијата која го направи најголемото изненадување во осминафиналето, Швајцарија.
Швајцарците за прв пат по СП 1954 година кое се одржа во нивната држава, се пласираа во четвртфинале на едно големо натпреварување, но според најавите немаат намера да застанат тука. Откако успеаја да го елиминираат првиот фаворит на ЕП, Франција, тие се надеваат дека ќе успеат да изненадат уште еден фаворит, Шпанија. Швајцарците губеа со 3:1 од Франција до 81 минута но успеаја да израмнат и да го однесат натпреварот до пенал рулетот каде во последната серија Јан Зомер го идбрани ударот на Килијан Мбапе.
– Натпреварот против Франција беше премногу емотивен за нас. Момците дадоа 120 проценти од своите можности, тоа беше најдобра партија на мојот тим досега. Сега истот мора да го повториме и против Шпанија – вели селекторот на Швајцарија, Владимир Петковиќ кој денеска нема да може да смета на суспендираниот Гранит Џака.
„Црвената фурија“ по лошиот старт на Евро 2020, на последните два натпревари и тоа кога беше најпотребно постигна 10 гола со што ги натера конкурентите повторно да стравуваат од нив.
– Ни зборуваа дека не можеме да постигне гол, но не се грижевме за тоа. Не ми е гајле против кого играме во четвртфиналето бидејќи не зависиме од нив и во натпреварот влегуваме горди и амбициозни со желба да се пласираме во полуфиналето – вели Феран Торес.
Победниците од денешните натпревари ќе играат во полуфиналето на „Вемлби“ во Лондон.