Српскиот фудбалер Стефан Цветковиќ (28) кој досега ги бранеше боите на Железничар, ќе ја продолжи својата кариера во есенскиот шампион Вардар.

Цветковиќ кој настапува на позицијата лево крило, запиша 53 натпревари, девет голови и пет асистенции за Железничар.

Започна во редовите на Црвена звезда, а играше и за ОФК Бачка, Чукарички, Металац, РФС од Рига и Раднички од Ниш.

Скопските „црвено-црни“ се подготвуваат за пролетниот дел од сезоната, а по серијата контролни мечеви во Анталија, закажан е и пријателски натпревар против ФК Осогово од Кочани кој ќе има хуманитарен карактер.

Натпреварот е организиран во чест и сеќавање на трагичниот настан од 16 март. Сите собрани средства ќе бидат наменети за изградба на спомен-обележје, како траен симбол на почит, сеќавање и достоинство.

ФК Вардар ги повикува сите навивачи и љубители на фудбалот да присуствуваат и заедно да покажеме хуманост, солидарност и заедништво. Натпреварот ќе се игра на 7 февруари на Градскиот стадион „Никола Мантов“ во Кочани со почеток од 14.00 часот.