Движењето Еколошко востание заедно со други организации денеска најави блокада на зградата на Владата на Србија на седницата закажана за 12 часот. Најавено е дека блокадата на зградата на српската Влада ќе трае се додека не се укине уредбата за просторниот план на специјалното наменско подрачје за реализација на проектот Јадар и додека на веб-страницата на Владата не се објават сите потпишани документи со Рио Тинто.

Еколошко востание најави дека ќе бара претставниците на тоа движење да присуствуваат на седницата на Владата и да побараат на дневен ред на седницата да биде ставена точка со која ќе се поништи уредбата за проектот Јадар.

„Ова е последен во низата обиди да се изврши притисок врз нашите институции, конечно да почнеме да работиме во интерес на граѓаните и во интерес на зачувување на нашата држава и нашиот народ. Доколку нашите барања се игнорираат, владата ќе биде единствена одговорна за се што ќе се случаи во следните денови при блокади и протести”, се вели во соопштението.