Синоќа во Виена се случило страшно злосторство, Србин ја убил својата сопруга, ги ранил ќерката и нејзиното момче, а потоа извршил самоубиство. Ќерката е во критична состојба, објави српски Телеграф.

Полицијата била повикана во еден стан во Виена во вторникот околу 19:30 часот поради расправија и пријава дека се слушнало пукање. Според првичните информации, 44-годишниот маж од Србија бил забележан пред зградата. На улица избила нова престрелка меѓу осомничениот и полицијата – сведоци пријавиле дека биле испукани четири куршуми.

Осомничениот потоа побегнал со возило. Сепак, недолго потоа полицијата го пронашла мажот мртов во автомобилот. Во станот било пронајдено тело на 44-годишна жена, а уште две лица биле тешко повредени.

Ќерката (24) на осомничениот и нејзиното 26-годишно момче добиле помош на самото место и биле пренесени во болница.

Неколку мигови пред ужасниот чин на насилство, сосетката ја сретнала ќерката на Србинот и нејзиното бебе во лифтот. Девојката наводно рекла дека имала „лошо претчувство“ за настаните од таа вечер.

— Немојте да се изненадите ако денес стане уште погласно. Моите родители се разведуваат — кажала таа.

Точните околности што довеле до убиството и самоубиството засега не се познати. Еден од можните мотиви, според медиумите, би можел да биде претстојниот развод на брачниот пар.

Државната криминалистичка полиција на Виена веќе ја презела истрагата.