Општина Центар – Скопје објави дека спортската сала „Работнички“ сега ќе го носи името на кошаркарската легенда Лазар Лечиќ.

На предлог на градоначалникот на Општина Центар, Горан Герасимовски, салата се преименува во чест на човекот кој остави длабока трага во македонската кошарка и во историјата на кошаркарскиот клуб Работнички.

– Салата е реконструирана од корен и таа сега доби целосно нов лик и заслужува име што ќе го продолжи духот и традицијата на клубот. Лазар Лечиќ е вистинска легенда и неговото име ќе живее овде, каде што испиша историја – стои во објавата на Општина Центар.

Спортската сала е по ФИБА стандарди, подготвена за нови спортски успеси и генерации што ќе ја продолжат славната кошаркарска приказна на Работнички.

Лечиќ својата професионална кариера како играч ја започнал во редовите на Работнички, а подоцна бил и тренер на оваа екипа во два наврати – прво од 1962 до 1972 година, а потоа и од 1975 до 1988 година.