Словенија слави поради одлуката за задолжителен божиќен бонус, но експертите се во паника и велат дека одлуката ќе „изеде“ две згради од Клиничкиот центар. Денеска се очекува премиерот Роберт Голоб да се сретне со претставници на организациите на работодавачи, кои се вознемирени од најавата за задолжителен божиќен бонус- пренесе Јутарњи.хр.

Одлуката беше донесена вчера од словенечката влада која усвои закон за исплата на зимскиот бонус на сите вработени, со кој се дефинира исплата на задолжителниот божиќен бонус во декември во износ од 639 евра ослободени од данок. Во законот за исплата на зимскиот бонус, словенечката влада предлага воведување на задолжителен божиќен бонус во износ од половина од минималната плата, на кој нема да се плаќа ниту данок ниту придонеси. Оваа година, божиќниот бонус би се исплатил најдоцна до 18 декември, додека работодавачите кои имаат проблеми со ликвидноста би можеле да го исплатат божиќниот бонус со задоцнување, по моделот на празничниот надомест, најдоцна до 31 март следната година.

Понатаму, само оваа година компаниите во тешкотии треба да им исплатат на своите вработени божиќен бонус во износ од една осмина од минималната плата, односно 160 евра. Услов за тоа би бил да не исплаќаат дивиденди и бонуси на менаџментот. Во јавниот сектор, сепак, на сите ќе им биде исплатен зимски бонус од 639 евра оваа година, а Министерството за финансии мора да подготви план за плаќање.

Работодавачите ја поздравија можноста за исплата на намалениот износ или негово одложување, но во исто време изразија желба за понатамошно приближување на ставовите.

„Драго ни е што доаѓаат со вакви предлози и ги поздравуваме, но тие сè уште не се на нивоата што ги очекуваме“, изјави во четврток Митја Гореншчек, главен извршен директор на Стопанската комора на Словенија.

Тој треба да ги презентира своите прелиминарни предлози на премиерот на претстојниот состанок, а за словенечката телевизија изјави дека работодавачите првенствено сакаат божиќниот бонус да остане доброволен. Синдикатите, кои го поддржуваат задолжителниот божиќен бонус, во меѓувреме, се убедени дека исплатата треба да биде иста за сите и дека „попуст“ за работодавците да го одложат плаќањето е доволен.

Според пресметките на министерството, вкупните трошоци за исплати на државните службеници ќе изнесуваат 118 милиони евра, но ако се земе предвид пошироката долгорочна загуба на јавни приходи (губење на данок на доход, придонеси за социјално осигурување во јавниот и приватниот сектор), тоа би изнесувало вкупно 372 милиони евра. Се очекува законот да биде испратен до парламентот до крајот на октомври, а новата седница на Економскиот и социјален совет би можела да се одржи помеѓу 27 октомври и 7 ноември. Владата планира да вклучи во истата законска рамка зимски додаток за пензионери од 150 евра оваа година, кој постепено ќе се зголемува до 2030 година.

Марко Јаклич, професор на Економскиот факултет во Љубљана, изјави за СТА дека, според неговите проценки, вкупните јавни финансиски трошоци за божиќниот бонус, како и зимскиот додаток за пензионери, кој е предвиден со пензиската реформа, би можел да изнесува околу 800 милиони евра. Тој износ всушност се две нови главни згради на клиничкиот центар годишно, илустрираше тој.

Во исто време, тој предупреди дека сето ова може да го зголеми словенечкиот буџетски дефицит за еден процентен поен, на околу четири проценти од БДП. И тоа е како што вели, веќе критично од неколку причини. Првата е ризикот од постапка за прекумерен дефицит на ниво на ЕУ, а втората е дека, според него, се очекува голема глобална економска криза за релативно кратко време, веројатно дури и во поголем обем од оној во 2008 година.

„Тешко е прецизно да се предвиди, но сигурно ќе удри силно и апсолутно нема да бидеме подготвени за тоа со такви мерки“, предупреди Јаклиќ.