Суровата марципанска маса најчесто се добива од лупени и мелени бадеми, а во ретки случаи и од ф’стаци. Се мелат со посебни валјаци, а крајниот резултат е фина паста. Следен чекор е додавање шеќер во прав, чија количина игра главна улога во квалитетот на марципанот – колку повеќе шеќер има, толку е понизок квалитетот на марципанот. Стандардите во производство на марципан не дозволуваат количината додаден шеќер да ја преминува количината на сурова марципанска маса. По додавањето шеќер се добива густа и цврста паста, која е еластична и може да се моделира во различни облици и да се бои со прехранбени бои. Најквалитетниот марципан во светот се произведува во градот Либек, Германија, бидејќи производителите гарантираат дека количината на бадеми во марципанот достигнува скоро 70 отсто.

Потекло на марципанот

Потеклото на овој вкусен десерт не е познато, освен дека од дамнешни времиња постоел метод на соединување бадеми со сок од шеќерна трска. Марципанот го нарекувале „храна на боговите“. Се верува дека првиот марципан бил произведуван пред околу 800 години пр.н.е, но иако не изгледал како денешниот, тој сепак се правел од бадеми. Кај нас со овој поим со децении се означуваше десерт, сличен на чоколадо, кој всушност нема никаква врска со вистинскиот марципан. Корените на оваа слатка треба да се бараат во Ориентот. Во првобитниот облик се појавил пред 1.000 години во источните делови на Медитеранот, а во Европа влегол преку Италија.

Долго време се сметал за заштитна марка на кралските дворови и аристократите. Причината за тоа е во шеќерот кој го содржи, кој бил многу скап производ. Во 17 век кога шеќерот станал достапен и за обичните луѓе, марципанот станал достапен и за посиромашните, но во никој случај не изгубил од својот квалитет.

Чувајте го во фрижидер

Во составот на марципанот влегуваат лупени и мелени бадеми, шеќер, јајца. Според содржината на бадеми се дели на два вида. Во едниот има 30 отсто бадеми, а во т.н. вистински марципан тој процент е над 50 отсто.

Како производ може да се најде во поголеми супермаркети, а задолжително мора да е спакуван со налепница на која се наведени производителот и рокот на употреба. Марципанот подготвен дома не треба да стои долго на собна температура, бидејќи во него нема конзерванси како во купениот. Се препорачува да се чува во кутија во фрижидер, добро завиткан во фолија. Имајте предвид дека фигурите од марципан на собна температура се сушат, па пожелно е да ги направите најрано 5-6 дена пред да ја правите тортата. Во лето тоа време треба да биде уште пократко.
Марципанот има широка примена во кондиторската индустрија. Се користи за украсување слатки и за правење на фигури. Тој може да се додаде и во смесата за правење колачи, торти, бонбони и сл. Во Германија правењето слатки од марципан е традиција за Божик и за Велигден. Столен е најпознатиот вкусен колач со марципан.

Подгответе си домашен марципан

Ако сакате сами да направите марципан, не грижете се, лесно е. Ви требаат 350 г мелени бадеми, 175 кристал шеќер, 170 г шеќер во прав, 1 јајце, 3 капки екстракт од бадем и 2 лажички сок од лимон. Бадемите потопете ги во врела вода околу 30 минути, потоа излупете ги и исушете ги. Сомелете ги на најситно, па соединете ги со шеќерот. Направете дупка и во средина ставете го јајцето, сокот од лимон и екстрактот од бадем. Мешајте да добиете густа смеса. Префрлете ја на работна површина посипана со шеќер во прав. Месете да добиете мазна, хомогена смеса. Не претерувајте со месење, затоа што смесата ќе стане мрсна и потешко ќе се работи. Добиената количина марципан е доволна да прекрие торта со пречник не поголем од 20 см.