По ужасните слики и видеа во текот на вчерашниот на кои можеше да се забележат илјадници пластични шишиња и останат отпад како пловат низ течението на реката Вардар, особено во центарот на Скопје и во Тетово, од Министерството за животна средина и просторно планирање денеска соопштија дека тоа се должи на, како што велат, незадоволителното ниво на комунални услуги, особено во руралните средини.

Оттаму велат дека токму во тие рурални средини се присутни голем број диви депонии на јавни површини, за чија санација и контрола се надлежни општините и нивните инспекциски служби.

ВИДЕО | Вардар денеска во ужасна состојба, во него наместо вода „тече“ ѓубре

Министерството и Државниот инспекторат за животна средина, како што велат од МЖСПП, постојано им укажуваат на општините поредовно да ги следат состојбите со управувањето со отпад и да ги засилат инспекциите, а воедно информираат дека во моментот се подготвуваат измени на Законот за инспекциски надзор.

„Во моментов, Државниот инспекторат е во фаза на подготовка на измени на Законот за инспекциски надзор во животната средина, со цел воспоставување единствен систем на инспекциски надзор што ќе овозможи поефикасна контрола во оваа област.“, велат од министерството.

Оттаму апелираа до општините, комуналните претпријатија и граѓаните за заедничка и поголема одговорност со цел да се зачува чистотата на реките и водните текови.