Автобиографијата на принцот Хари, која го одбележа почетокот на 2023 година, конечно е објавена и на македонски јазик, со наслов „Резерва“. Книгата е во издание на „Арс Либрис“, која е дел од издавачката куќа „Арс Ламина“.

Имено, принцот Хари ја разбранува светската јавност со деталите од неговото детство и за болката по смртта на мајка му, принцезата Дијана.

„Тоа беше една од највпечатливите фотографии на 20 век: две момчиња, двајца принцови, чекорат зад ковчегот на нивната мајка додека светот гледа со тага – и со ужас. Додека траеше погребот на принцезата Дијана, милијарди луѓе се прашуваа што мислат и што чувствуваат принцот Вилијам и принцот Хари – и како ќе се одвиваат нивните животи од тој момент понатаму. Пред да ја изгуби мајка му, дванаесетгодишниот Хари беше познат како безгрижната и среќна Резерва на многу посериозниот Наследник. Тагата промени сè“, стои во описот на книгата.

Исто така, тој во своите мемоари раскажа за проблематичните тинејџерски денови, за приклучувањето на британската армија и за неговиот престој во Авганистан. Но, она што остави најголем впечаток кај читателската публика беше неговото согледување на односите со татко му, кралот Чарлс Трети, и со брат му, принцот Вилијам.

Книгата беше објавена на 10 јануари годинава и за кратко стана најзборуваната тема во светот на поп-културата. Според Гинисовата книга на рекорди, таа стана најбрзо продаваната книга од областа на нефикцијата на сите времиња.

Книгата е бестселер на „Њујорк тајмс“ и, генерално, доби позитивни оценки од книжевните критичари.

Досега е преведена на повеќе од 15 јазици, меѓу кои и на македонски јазик.

Утре излегува „Резерва“: Сите скандали кои принцот Хари ги откри досега