Синдром на забрзано стареење: Тифани старее осумпати побрзо од другите
Лекарите велат дека Тифани е „медицинско чудо“, додека таа ја припишува заслугата на јогата што ѝ помогнала да продолжи да го живее животот. Тифани, која има свој бизнис, вели дека има многу среќа што сè уште е тука и дека постојано размислува дека секој ден ѝ е последен.
Братот на Тифани, Чад, починал од компликации поврзани со прогерија во 2012 година на 39-годишна возраст. Во моментов живеат само 179 луѓе во светот со прогерија, во 53 земји. Тифани не само што е најстарата жива личност со оваа состојба, туку се смета и за најстариот преживеан во историјата.
– Отсекогаш сум била многу активна, возам велосипед, се занимавам со јога. Мислам дека сте она што го јадете, па затоа се хранам здраво – велиТифани.
На Тифани ѝ е дијагностицирана прогерија во доцните дваесетти години, што значи дека поминала половина од животот со овој синдром целосно несвесна. Таа и нејзиниот брат ја добиле дијагнозата пред 15 години, а состојбата ја наследиле од нивната мајка.
Прогерија ја предизвикува мутациски ген што децата го наследуваат од родителите. Децата родени со него обично покажуваат симптоми од втората година и ретко остануваат живи по 20-тата година од животот. Чад, кој починал пред осум години, и Тифани се единствени бидејќи се најстарите случаи забележани досега.
Освен забрзаното стареење, симптомите на Тифани вклучуваат и низок раст. Висока е само 134 см.
Исто така, има и потесно лице, тесна долна вилица и тенки усни.
– Растејќи сфатив дека се развивам поинаку од другите. Тоа не влијаеше на мене, бидејќи можев да ги правам работите што ги сакав. Кога косата почна да ми опаѓа и ги изгубив забите во раните дваесетти, мојот лекар се загрижи за мене. Сепак, за прогерија дознавме дури кога брат ми сакаше да добие дете, па отиде на генетско тестирање – реклаТифани, која во меѓувреме се омажила и се развела.
Дури и нејзиниот лекар бил шокиран, бидејќи децата со прогерија обично умираат од срцев или од мозочен удар на тинејџерска возраст.
За разлика од повеќето што страдаат од екстремни кардиоваскуларни и проблеми со коските, Тифани, која носи протези, сепак може да живее сама без сериозни дополнителни здравствени проблеми.
Неодамна почнала да го зема и новиот лек, за кој се смета дека го забавува процесот на стареење и е многу близу до одобрување како прв лек против прогерија, пишува „Метро“.