Што се наоѓа во Оксфорд вакцината која треба да нѐ заштити од коронавирусот?

EPA EFE
Тестирање за коронавирус, Фото: EPA-EFE/ORESTIS PANAGIOTOU

Експертите во текот на клиничкото тестирање забележале дека вакцината предизвикува силна имунолошка реакција на коронавирусот.

Вчера на насловните страници од медиумите одекна веста дека научниците од Оксфорд во соработка со фармацевтската компанија АстраЗенека успешно ја спроведоа првата и втората фаза од клиничките тестирања (тестирања врз луѓе) на вакцината против коронавирус и дека таа предизвикува безбедна имунолоѓка реакција.

Но, експертите напоменаа дека оваа студија не траела доволно долго за да се утврди колку трае стекнатиот имунитет и колку тој во суштина е ефикасен, однсоно колку може да не заштити од заразата со ковид-19. Она што споменатите клинички испитувања го покажаа е дека вакцијата поттикнува одреден степен на имунолошка реакција и дека е безбедна во смисла дека нема сериозни нус појави.

Што точно се наоѓа во таа вакцина? Многумина се запрашаа дали е направена од ослабена верзија на вирусот кој го предизвикува ковид-19 и како знаеме дека вирусот внатре во вакцина, за кој вид и да се работи, нема да се одметне, реплицира и да направи хаос во нашиот организам.

Во вакцината се наоѓа вирус на обична настинка

Споменатата вакцина, ChAdOx1 nCoV-19, е изработена од вирусот ChAdOx1, односно ослабена верзија на вирусот на обична настинка (аденовирус) кој предизвикува инфекции кај шимпанзата. Таа верзија е генетски модифицирана да не може да се реплицира кај луѓе, поради тоа не може да предизвика сериозни инфекции.

На вирусот ChAdOx1 му е додаде генетски материјал од вирусот ковид-19 (SARS-CoV-2) кој се нарекува гликопротеин Ѕ. Тој протеин, кои по изглед потесетува на шилец, се наоѓа на површината на САРС-КоВ-2 и со него коронавирусот се врзува за АЦЕ2 рецепторите во човечките клетки и на тој начин продира во нив и ги инфицира.

Вакцината ChAdOx1 nCoV-19 би требало да му овозможи на телото да го препознае тој протеин и на него да развие имунолошка реакција со што би требало да спречи идно продирање (инфекција) со коронавирусот на човечка клетка, стои во соопштението на научниците од Оксфорд кои работат на развојот на оваа вакцина.

Колку е оваа вакцина успешна?

Иако засега се уште не е познато колку е долготраен имунитетот предизвикан од вакцината ChAdOx1 nCoV-19, експертите во текот на клиничкото тестирање забележале дека вакцината предизвикува силна имунолошка реакција на коронавирусот.

Имено, вакцината во рок од 14 дена по вакцинирањето предизвикала реакција на Т клетките (бели крвни клетки кои можат да ги нападнат клетките заразени од вирусот САРС-КоВ-2) и во период од 28 дена по вакцинирањето создаваат реакција на антитела кои можат да го неутрализирааат вирусот.

„Најсилниот имунолошки одговор забележавме кај оние 10 испитаници кои примија две дози од вакцината, што укажува на тоа дека таа би можело да биде добра стратегија во превенција од заразата“, вели имунологот Ендру Полард кој учествува во ова истражување.

Во текот на оваа фаза од клиничкото тестирање (фаза I/II), која започна од април оваа година, вакцината е тестирана на повеќе од 1000 здрави доброволци на возраст меѓу 18 и 55 години.Дел од испитаниците, само 10 од нив примиле две дози вакцина.

Меѓу 23 април 2020 и 21 мај 2020, 1077 доброволци примиле вакцина ChAdOx1 nCoV-19 или плацебо вакцина MenACWY. Испитувањата покажале дека, покрај имунолошка реакција, немале други сериозни здравствени нус појави поврзани со ChAdOx1 nCoV-19.

Во идната  III. фаза од клиничките испитувања ќе учествуваат повеќе од 10.000 луѓе во Велика Британија, 30.000 во САД, 2.000 во Јужна Африка и 5.000 во Бразил.

„Охрабрени сме од привремените податоци на фазата I/II кои покажуваат дека AZD1222 успешно предизвикал реакција на антитела и Т-клетки на САРС-КоВ-2 Иако имаме уште многу работа, досегашните резултати покажуваат дека вакцината е делотворна, што ни овозможува да продолжиме со плановите за производство на вакцина ширум светот“, вели Мене Пандалот, извршен потпретседател на Одделот за истражување и развој во АстраЗенека.

Вакцина ќе имаме до крајот на годината

„Можно е да се излезе со вакцина до крајот на годината, но тоа не можеме да го гарантираме зошто ни се потребни три работи“, рече раководителот на истражувањата Сара Гилберт за Би Би Си.

„Вакцината мора да се покаже делотворна во доцните фази од клиничките испитувања, потребно е да се произведе во големи количества и регулаторните тела треба да се согласат брзо да издадат дозвола за употреба во итни случаи“, објасни Гилберт.

Студијата од клиничкото испитување на вакцината ChAdOx1 nCoV-19 се нарекува Safety and immunogenicity of the ChAdOx1 nCoV-19 vaccine against SARS-CoV-2: a preliminary report of a phase 1/2, single-blind, randomised controlled trial и е објавена во угледното медицинско списание The Lancet.

Огромна доза надеж за вакцината на Оксфорд

Видео на денот