Германскиот второлигаш Нирнберг нема да игра вечерни натпревари откако градскиот совет во петокот одлучи да ја ограничи употребата на рефлектори на стадионот „Макс Морлок“ поради енергетската криза, пренесува „Ројтерс“.

Руската агресија врз Украина ги зголеми цените на енергијата ширум светот, а Германија, која беше силно зависна од руската енергија, се бори да ја намали потрошувачката на енергија како што се приближува зимата.

– Во зима може да има недостиг од гас и струја. Поради ова, градскиот совет повторно расправаше каде можеме да заштедиме енергија – се вели во соопштението и се додава дека донел одлука за ограничување на употребата на рефлектори и подземно греење.

– Греењето на теренот на стадионот ќе остане исклучено по договорот со Германската фудбалска лига (ДФЛ). Ја ограничуваме употребата на рефлектори најмногу до 21 часот – соопштија од Советот.

Така, поранешниот бундеслигаш нема да организира вечерни натпревари кои започнуваат во 20.30 часот. Нирнберг моментно е на 13 место во Втората германска лига.