Кошаркарската репрезентација на Шпанија уште еднаш го оправда епитетот на најдобра репрезентација во Европа во 21 век и вечерва по четврти пат се искачи на кошаркарскиот Олимп.

„Фуријата“ во финалето на ЕП со 88:76 ја совлада Франција и покажа дека никогаш не смее да се потценува или да се отпишува од битката за трофеите.
Иако си заминаа браќата Гасол, Серхио Родригез, а ги немаше ниту Никола Миротиќ, Серж Ибака, Рики Рубио и Серхио Љуљ кои не играа поради повреди, најголемата кошаркарска династија во Европа во 21 век најде начин повторно да се искачи на тронот.

Шпанија на Евробаскетот кој поради промената на терминот на ОИ во Токио беше одложен за една година, дојде како освојувач на девет медали од последните 10 Европски првенства, но не и се даваа големи шанси за титулата во конкуренција на Словенија, Грција и Србија кои беа предводени од најголемите НБА ѕвезди, Лука Дончиќ, Јанис Адетокумпо и Никола Јокиќ.

🇪🇸 Otra generación.. mismo resultado: CAMPE🏆NES#EuroBasket x #BringTheNoise pic.twitter.com/UNSXCCAdKc

— #EuroBasket 2022 (@EuroBasket) September 18, 2022

Но, Серџо Скариоло уште еднаш покажа дека знае како да го извлече максимумот од репрезентацијата и на крајот по четврти пат да го освои златниот медал. Шпанија беше европски шампион во 2009, 2011 и 2015 година.

Шпанците во финалето без поголеми проблеми ја победија Франција, а Хуанчо Ернангомез испиша историја со тоа што стана единствениот играч кој влезе од клупата и постигна шест тројки во првото полувреме. Хуанчо можеше да го достигне и рекордот на Александар Саша Ѓорѓевиќ од 1995 година, кога во финалето против Литванија даде 9 тројки од 12 обиди, но Ернангомез застана на 7 тројки.

Финалето започна со поенот од слободно фрлање на Руди Гобер по што во наредните три минути никој не постигна поени од игра, а потоа започна рапсодијата на Шпанците и поведоа со 18:7.

Хуанчо погодуваше тројки, Скариоло добро ја прочита тактиката на францускиот селектор Венсан Коле што доведе го неколку загубени топки на „триколорите“, а прецизната рака на браќата Ернангомез донесоа предност од 20 поени.

„Триколорите“ се разбудија и со серија 11:0 на крајот од втората четвртина кога успеаја да ја намалат разликата и на полувремето застанаа на прифатливи 47:37 во корист на Шпанија.

Серијата на Французите продолжи и во третата четвртина и по петте поени по ред дојдоа до минус три (49:46). Скариоло повика тајм-аут и потоа работите дојдоа на свое место за Шпанија.

Во тие моменти, клучен беше Хаиме Фернандес со осум постигнати поени по што Шпанија поведе со 61:48. Французите се доближија на 63:57, но Руди Фернандез со тројката ги реши дилемите околу новиот европски шампион.

Најдобар во финалето беше Хуанчо Ернангомез со 27 поени, 7 тројки и 5 скока, неговиот брат Вили постигна 14 со 8 скока, 14 поени даде Лоренцо Браун, а Хаиме Фернандеш постигна 13 поени.

Во редовите на Франција Еван Фурние постигна 23 поени, Томас Ертел имаше 16 со 7 асистенции, а Јабуселе 13 поени и 6 асистенции.