Македонскиот шампион Шкупи вечерва го доби противникот во плеј-офот за пласман во групната фаза во Лигата на конференции, тоа е косовски Балкани кој го преживеа гостувањето во Фарски Острови кај Клаксвик и победи по подобро изведување пенали.

Реванш натпревар во регуларниот дел заврши 2:1 за Клаксвик кој успеа да ја анулира предноста на Балкани од првиот натпревар (2:3) по што се играа продолженија.

Во дополнителното време немаше промена на резултатот и победникот мораше да биде одлучен во пенал серијата каде играчите на Балкани промашија само еднаш додека Клаксвик не реализира два пенали преку Холвад и Даниелсен.

Првиот натпревар од плеј-офот ќе се игра идниот четврток во Скопје, а реваншот е закажан за 25 август во Приштина.

Поранешниот фудбалер на Вардар, Јасир Асани постигна два гола за Кишварда во реванш натпреварот против Молде, но не успеа да обезбеди пласман во плеј-офот. Асани двата гола ги постигна во првото полувреме, во 14 и во 29 минута, но тоа беше премалку за Кишварда да го елиминира Молде кој во првиот дуел славеше со 0:3, а вечерва загуби само со 2:1.