Македонскиот фудбалски шампион Шкупи вечерва (21 часот) против Балкани го игра првиот натпревар од плеј-офот за пласман во групната фаза во Лигата на конференции. Фудбалерите на Шкупи првиот чин од двомечот со Балкани во кој бркаат историски пласман во групната фаза, ќе го играат на Националната арена „Тодор Проески“.

Тренерот на Шкупи, Гоце Седлоски, очекува од неговите фудбалери со мирни глави да влезат во натпреварот и да се обидат да дојдат до позитивен резултат што би им гарантирал помирен реванш идниот четврток.

– Ни следува двомечот против Балкани, добра вест е што ги имам сите играчи на располагање, немаме повредени, ни казнети. Треба со мирни глави да влеземе во мечот, да бидеме трпеливи, најдобро што можеме да се претставиме против Балкани. Верувам дека сме способни за тоа, гледам како тренираат фудбалерите и сметам тоа ќе го реализираат на теренот. Балкани е квалитетен противник, штом стигна до плеј-офот значи дека има добри играчи. Во Скопје ќе биде само „првото полувреме“, нашето е да го дадеме максимумот и бидат исполнети задачите кои ќе бидат поставени – изјави Седлоски на прес конференцијата пред утрешниот дуел.