Шкендија против Мура ја отвора сезоната во европските купови
Вечерва од 20 часот на Националната Арена „Тодор Проески“, екипата на Шкендија ги започнува натпреварите во квалификациите за пласман во Лигата на шампионите. Противник на македонскиот фудбалски шампион е словенечка Мура.
– Состојбата е одлична во нашите редови, се подготвувавме добро во изминатиот период за овој предизвик. Играчите се спремни за двомечот со Мура, и противникот има свој квалитет, но мислам дека можеме да се надеваме на успешен европски старт – вели тренерот на Шкендија, Ернест Ѓока.
Иако словенечкиот шампион воопшто не е наивен тим, капитенот на Шкендија и македонски репрезентативец Егзон Бејтулаи смета дека Мура не е непобедлив тим и со колективна игра можат да се пласираат во втората рунда од квалификациите.
– Ќе работиме на тоа за да дојдеме до остварување на целта, а тоа е пласман во групната фаза. Екипата на Мура ја анализиравме добро, има добар тим, мислам дека можеме да ја прескокнеме оваа пречка. А за да ја поминеме потребна е колективна игра во овој двомеч, искуството е наша страна, но нема да ни биде лесно, доколку не го дадеме максимумот. Мора да дадеме сè од себе и се надеваме дека на крајот ќе оствариме позитивен резултат и ќе ги израдуваме нашите навивачи – вели Бејтулаи.
Фото: ФК Шкендија