Шилегов: Обезбедени се услови за отстранување на првата галија, рокот е 30 дена (ВИДЕО)
Ќе се отстрани една од галиите во Вардар. Обезбедени се услови за дислоцирање на првата галија, рече денеска на прес-конференција градоначалникот на Град Скопје, Петре Шилегов.
Скопскиот градоначалник изјави дека нема да има опасност од финансиски трошоци за буџетот на градот и дека рокот за остранување на галијата во близина на панорамското тркало ќе биде 30 дена.
– Во рок од 30 дена, сметано од денеска, корисникот треба да го отстрани она што се нарекува урбана опрема. Во спротивно по 10 април, кога е истекот на рокот, Градот на негов трошок ќе го направи тоа, нагласи Шилегов.
Тој потенцираше дека поставувањето на урбана опрема во Вардар претставува опасност од потенцијална поплава, и поради тоа ќе работи на создавање на услови за отстранување и на останатите галии.
-Безбедноста е на прво место, а во моментов поради галиите во Вардар, има опасност од поплави. Ќе продолжиме со отстранување и на следните галии, истакна Шилегов.
Инаку, галиите иако се вбројуваат во урбана опрема, тие спаѓаат во градежни објекти, и најверојатно нема да бидат пренесени на ниту едно друго место, туку, како што рече Шилегов, ќе бидат само отстранети.
– Ако има желба сопственикот, ние ќе му ја однесеме галијата каде што ќе сака, дополни Шилегов.