Гром предизвика технички проблеми на граничниот премин „Евзони“ на македонско-грчката граница, објавија српски медиуми.

Ударот на громот предизвика прекин на електричната енергија и го наруши работењето на клучните системи.

Според последните информации објавени на српските медиуми, агрегатите во моментов не успеваат да обезбедат доволно енергија за непречено функционирање на сите уреди и услуги на преминот.

Српски туристи објавија на социјалните мрежи дека останале во мрак поради дефектот со струјата.

Дополнителни тешкотии се појавија поради проблеми со интернет-врската, па дури и во областите каде што снабдувањето со електрична енергија е стабилизирано, системите не работат со полн капацитет.

Поради комбинација од прекини на електричната енергија и прекини во комуникациските мрежи, имаше сериозни застои и отежнато функционирање на преминот, што предизвика целосен колапс на работата на граничните служби.

Граѓаните кои треба да го преминат овој граничен премин навечер велат дека се загрижени за целата ситуација бидејќи не знаат што ги чека.

Пороен дожд, грмежи и град ги погоди Штип, Гевгелија, Неготино и Демир Капија