Министрите за надворешни работи на водечките развиени земји од групата Г7 денеска изразија силна поддршка за прогласениот прекин на огнот меѓу Израел и либанската милитантна група Хезболах, најавија дополнителна поддршка за Украина, но го заобиколија прашањето дали ќе го спроведат меѓународниот налог за апсење на на израелскиот премиер Бенјамин Нетанјаху од судот во Хаг за воени злосторства во Газа, пренесе „Јуроњуз“.

Во последната изјава по нивниот состанок во Фјуџи, во близина на Рим, министрите на Г7 побараа од Израел „да обезбеди целосна, брза, безбедна и непречена хуманитарна помош во сите нејзини форми“ за Палестинците во Газа, предупредувајќи дека војната предизвикала „невидена несигурност во снабдувањето со храна“.

Министерот за надворешни работи на ЕУ во заминување, Жозеп Борел, денеска на маргините на состанокот на Г7 изјави дека „нема оправдување“ Израел да одбие да прифати прекин на огнот, велејќи дека сите негови безбедносни проблеми се решени со договорот постигнат со посредство на САД и Франција.

Борел рече дека според предложениот договор, САД ќе претседаваат со комитетот за спроведување на прекинот на огнот во Либан, додека Франција ќе учествува на барање на Либан.

Тој, исто така, повика на зголемен притисок врз Израел да не попушта пред екстремистите во владата кои одбиваат да го прифатат договорот.