Северна Кореја го воведе рускиот јазик како задолжителен предмет во училиштата од четврто одделение, што е последната манифестација на продлабочувањето на стратешките односи меѓу Пјонгјанг и Москва, објави Политико.

На состанокот на меѓувладината комисија во Москва, рускиот министер за природни ресурси Александар Козлов изјави дека во Северна Кореја моментно околу 600 лица учат руски, кој е меѓу трите најпопуларни странски јазици во земјата. Истовремено, расте и интересот за корејскиот јазик во Русија, каде што 3.000 ученици и 300 студенти го изучуваат.

Козлов откри дека минатата година 96 Севернокорејци биле примени на руски универзитети, меѓу кои и престижниот МГИМО, а годинава уште 29 студенти започнале студии по геологија во Русија. Двете држави ја продлабочуваат соработката во образованието, банкарството, енергетиката, медицината и геологијата, а Русија веќе гради центар за руски јазик на Универзитетот „Ким Чол Џу“.

Односите меѓу Русија и Северна Кореја дополнително се зацврстија по руската инвазија на Украина во 2022 година. Северна Кореја, според извештаи, испорачува оружје и испраќа војници да дејствуваат на фронтот и во регионот Курск, а руските и севернокорејските хакерски групи Гамаредон и Лазарус наводно соработуваат во киберпросторот.

Зајакнувањето на врските е видливо и во туризмот: ова лето првите групи руски туристи пристигнаа во севернокорејските одморалишта благодарение на новите директни летови до Пјонгјанг.