Поранешниот италијански репрезентативец Антонио Касано смета дека квалитетот на Серија А е далеку од тој на лиги како Премиер лигата или Ла Лига и не смее да се смета за елитно натпреварување.

Според Касано, реалноста на Серија А е во најдобрите екипи да играат по натпросечни фудбалери, за разлика од минатото кога полните стадиони гледаа екипи кои беа преполни со фудбалски суперѕвезди.

– Италијанската лига е многу полоша отколку што мислиме. Тоа го покажува најдобрата екипа во Италија, Милан кој во Европа оствари катастрофален резултат во четири наптревари. Тоа ми потврдува дека Серија А е дури петта најдобра лига во Европа – изјави Касано во подкастот кај уште еден поранешен играч, Кристијан Виери.

Според коефициентите на најдобри лиги, најдобро домашно натпреварување е Премиер лигата, Ла Лига е втора, а Серија А е трета пред Бундеслигата и Лига 1.

Но, Французите го имаат ПСЖ, а Германците  го имаат Баерн Минхен и тоа се две екипи кои постојано се меѓу најголемите фаворити за триумф во Лигата на шампионите. За разлика од нив, првопласираната екипа во Серија , Наполи игра во Лигата на Европа, додека второпласираниот Милан по четири кола се уште нема победа во Лигата на шампионите.