СЕХА: Вардар драстично „ослабен“ за кинескиот тест!
Во вторник „црвено-црните“ ќе гостуваат кај дебитантот во регионалното натпреварување, кинеската екипа на Пекинг СУ во Загреб (Хрватска). Тоa ќе биде последна „контрола“ пред дуелот со белорускиот Брест Мешков во Лигата на шампионите.
Ракометарите што беа со своите репрезентации директно заминуваат за хрватскиот главен град, а оние што тренираа во Скопје денеска ќе им се приклучат. Вечерва ќе тренираат заедно, а утре натпреварот е закажан за 17.15 часот. Веднаш по мечот се враќа македонскиот шампион во Скопје и почнува со подготовките за средбата од ЛШ.
Павел Атман и Сергеј Горпишин се повредени и остануваат во Скопје да им биде извршен лекарски преглед, а Сташ Скубе е болен и доби препорака неколку денови да не тренира и да мирува. Тие се приклучуваат на Стојанче Стоилов и Жозе Толедо кои се уште не почнале да играат.
– Имавме долг и напорен пат за време на ЕХФ неделата. Сега веднаш почнуваме со натпревари. Можеби на хартија Пекинг е аутсајдер, но ние никогаш не го потценуваме ривалот. Сакаме да одиграме максимално, бидејќи ова е сепак официјален натпревар. Пекинг од натпревар во натпревар игра подобро, и ние секако тоа го сфаќаме сериозно. Имаме проблеми во нашиот тим, но, секако сите други ќе дадат се од себе – рече Едуард Кокшаров, тренерот на Вардар.