Државниот завод за статистика објави дека во третото тримесечје од 2025 година е забележан пад на бројот на склучени бракови, но истовремено значително е зголемувањето на разводите.

Во периодот јули–септември биле регистрирани 3.514 нови бракови, што претставува пад од 2.8 проценти во споредба со истиот период во 2024 година.

Паралелно, евидентирани се 470 разводи, односно 27.7 проценти повеќе отколку лани, што го потврдува трендот на растечка бракоразводност.

Во третото тримесечје од 2025 година бројот на живородените деца изнесува 4.431 и во споредба со истиот период од 2024 година е зголемен за 3,7%.

Бројот на умрените лица, бележи намалување од 0,5% во споредба со истото тримесечје од 2024 година и изнесува 4.849 лица. Од нив, 20 се починати доенчиња.

Природниот прираст е негативен и изнесува -418 , што значи дека за толку лица е помал бројот на живородените деца од бројот на умрените лица.