Освежителна и лесна за јадење, оваа салата може да ви послужи и како оброк, ако ја искомбинирате со препечено  лепче. Или пак можете да ја послужите како  додаток  со некое убаво јадење.

Состојки:
– 3 главици цвекло
– 1 црвена марула
– 2 китки дива рукола
– 4 топки моцарела
– 2 големи портокали
За преливот:
– 3 лажици јаболков оцет
–  6 лажици маслиново масло
– 2 лажици сок од портокал
– малку рендана кора од портокал
– 2 лажички мед
– 1 лажичка сенф
– сол

Подготовка:
Цвеклото исечете го  на кругови, прободете ги со виљушка на неколку места и ставете ги во тава наполнета со мала количина вода. Покријте ја тавата со алуминиумска фолија и печете 40 минути во загреана рерна на 150 степени.

Одвреме-навреме проверувајте го цвеклото колку е омекнато, бидејќи многу меко цвекло може да биде кашесто за сервирање и јадење. За тоа време ставете ги во тегла состојките потребни за преливот, затворете ја со капак и протресете да се измешаат состојките. Откако круговите цвекло ќе се испечат, префрлете ги во чинија и полејте ги со дел од преливот.

Руколата и марулата измиени и искинати на покрупни парчиња прелејте ги со преливот и измешајте ги. Во чинии за сервирање прво наредете го цвеклото, над него зачинета рукола и марула.  Топката моцарела раскинете ја со раце, додајте кругови лупен портокал и прелејте со остаток од преливот.

Ако ја подготвувате оваа салата во сезона на калинки, можете да прошарате и со неколку семки од калинка.