Претседателот на Федералните резерви, Џером Пауел, денеска изјави дека централната банка се соочува со потенцијални кривични обвиненија од Министерството за правда, што го зголемува притисокот со кој се соочува поради одбивањето да се потчини на притисокот на претседателот Доналд Трамп врз каматните стапки, пренесува Њујорк тајмс.

Федералните резерви беа известени од Министерството за правда дека може да бидат поднесени кривични обвиненија поради сведочењето на Пауел во јуни на конгресното сослушување за планот за реновирање на зградите на банката, се вели во соопштението на претседателот.

Ова известување, според него, е дел од климата на притисок што ја врши американскиот претседател Доналд Трамп врз институцијата за да ја принуди дополнително да ги намали каматните стапки, во време кога инфлацијата сè уште е над целта од 2%.

„Оваа закана не се однесува на мојата изјава. Тоа е изговор, заканата од гонење е последица на волјата на Федералните резерви да одлучува за своите каматни стапки во јавен интерес, а не да одговара на преференциите на претседателот“, се пожали Пауел во видео објавено од веб-страницата на централната банка.

„Станува збор за тоа дали Федералните резерви ќе можат да продолжат да ги одредуваат каматните стапки врз основа на податоците и економските услови – или дали монетарната политика наместо тоа ќе биде водена од политички притисок или заплашување“, додаде Пауел.

Video message from Federal Reserve Chair Jerome H. Powell: https://t.co/5dfrkByGyX pic.twitter.com/O4ecNaYaGH

— Federal Reserve (@federalreserve) January 12, 2026

Истрагата, која вклучува анализа на јавните изјави на Пауел и преглед на евиденцијата за трошење, беше одобрена во ноември од Џанин Пиро, главниот обвинител на округот Колумбија и долгогодишен сојузник на претседателот Трамп.

Пауел ја опиша истрагата како „без преседан“ и го доведе во прашање мотивот зад овој потег, тврдејќи дека ги извршувал своите должности како претседател „без политички страв или наклонетост“.