Американскиот претседател Доналд Трамп изјави дека Вашингтон „не си игра игри“ со Москва и откри дека американска нуклеарна подморница е во близина на рускиот брег.

Изјавата дојде откако рускиот претседател Владимир Путин го објави успешниот тест на крстосувачка ракета со нуклеарен погон, „Буревестник“, која, според него, прелетала 14.000 километри и останала во воздух 15 часа.

„Ја имаме најдобрата нуклеарна подморница во светот веднаш до нивниот брег. Не мора да оди 8.000 милји. Тие не си играат игри со нас, а ние не си играме игри со нив“, изјави Трамп за новинарите на бродот „Ер Форс Уан“ – пренесе Бизнис инсајдер.

Трамп ја нарече изјавата на рускиот лидер за тестот Буревестник „несоодветна“, нагласувајќи дека Путин треба да се фокусира на прекинување на конфликтот во Украина.

„Војна што требаше да трае една недела е на прагот да влезе во својата четврта година. Тоа е она што треба да го прави Путин, да ја прекине, наместо да тестира нови ракети“, рече американскиот претседател.

Тој додаде дека украинскиот конфликт би можел да стане „деветтата војна што тој ќе ја реши“.

„Решив осум војни, а деветтата доаѓа при крај. Мислам дека е меѓу Русија и Украина“, рече Трамп.

Кога беше прашан за можноста за воведување нови санкции врз Русија, американскиот претседател одговори остро: „Ќе дознаете“.

Тој додаде дека не бил вклучен во разговорите за користење на замрзнатите руски средства за финансирање на Киев, нарекувајќи го тоа „прашање на Европската Унија“.