ВИДЕО | Хидроавион се урна и се запали во САД, сите патници се спасени
Единаесет лица се спасени откако хидроавион извршил принудно слетување и се урнал покрај брегот на државата Вашингтон, САД. Несреќата предизвика масовна операција за пребарување и спасување во која учествуваа повеќе агенции, објави Си-ен-ен.
Препорачано
Сите десет патници и пилотот на авионот на „Кенмор ер“ се безбедни и се однесени во болница. Авионот се запалил во близина на островот Сусија, дел од островите Сан Хуан, по принудното слетување. Американската крајбрежна стража ја потврдила оваа информација за Си-ен-ен.
Kenmoore Air Crash at Sucia Island.
If you had someone you knew on this plane, they all made it off the plane before it blew up. All sustained injuries, I’ll update as I know more.@KenmoreAir pic.twitter.com/6yvbVGwW7R
— JMS (@JMSonaXX) July 24, 2026
Четири лица се однесени во болница со сериозни повреди, објави Си-ен-ен повикувајќи се на портпарол на „Кенмор ер“. Шерифот на округот Сан Хуан, Ерик Питер, изјави дека еден од четворицата повредени патници е во критична состојба.
„Повредите се движат од повреди на главата до скршеници и исеченици“, рече Питер.
Двајца од повредените се однесени во болница во Белингам, а двајца во болница во Сиетл, потврди авиокомпанијата. Останатите седум патници се однесени во база на крајбрежната стража за понатамошна евалуација.
Причината за принудното слетување сè уште е непозната. Портпарол на „Кенмор ер“ изјавил дека хидроавионот полетал во 16:30 часот од Сиетл до пристаништето Рош, дестинација оддалечена околу 100 милји. Авионот се урнал приближно 45 минути по полетувањето.
Американската крајбрежна стража соопшти дека ги добила првичните извештаи за несреќата околу 17:25 часот по локално време. Веднаш била започната спасувачка операција во соработка со американската морнарица, канадската крајбрежна стража и локалните власти.
„Благодарни сме што сите кои беа во авионот се на број. Наш непосреден приоритет е да се осигураме дека патниците и пилотот ќе ја добијат потребната грижа и поддршка. Целосно соработуваме со истражните органи и ќе продолжиме да објавуваме проверени информации штом ќе станат достапни“, изјави извршниот директор на „Кенмор ер“, Дејвид Гуџел.
