Шпанскиот кошаркар Рики Рубио ќе потпише договор со Барселона до крајот на сезоната, пренесува „Марка“.

Вакво нешто се најавува уште од моментот кога Рубио испрати барање до Барселона да тренира во клубот за да се подготви за новиот предизвик по заминувањето од НБА лигата. Каталонците му одговорија потврдно, а сега успеале и да постигнат договор. Шпанецот ќе биде дел од екипата до крајот на сезоната.

Барселона ќе го регистрира пред истекот на рокот во Евролигата за ангажирање на нови играчи (среда), но нема да брза со неговото деби, туку Рубио ќе продолжи да ја бара својата форма.

Рубио изминатото лето имаше проблеми со менталното здравје и минуваше низ тежок период, па поради тоа и го пропушти Светското првенство во Манила, па во Барселона сакаат да бидат трпеливи.

Своевремено Рубио настапуваше заедно со сегашниот тренер на Барселона Роџер Гримау и во текот на 2010 година со Барселона ја освоија Евролигата.