На патеката долга 6,4 километри кон планинскиот туристички центар Пониква денеска се возеше ридско-брзинската трка „Кочани 2019″, во рамки на Државниот шампионат во автомобилизам.

На натпреварот, чиј организатор беше АКК „Custom car RT” од Скопје, во сите четири класи учествуваа 25 возачи од Македонија и гости од Бугарија, а трката ја завршија 18 возила.

Во класата N-1400 имаше само двајца натпреварувачи, а трката успешно ја заврши Тоше Темелковски од АКК „Скопје”. Кај возачите од класата Е1-1600 победи Филип Василевски од АКК „Custom car RT”, а во најсилната класа Е1-2000 првото место му припадна на Димитри Кимовски од АКК „Перформанс”.

Во екипна конкуренција најмногу поени освоија возачите од АКК „Custom car RT”, пред АКК „ПСС РТ” и АКК „Скопје”. На прогласувањето на најдобрите, награди им беа доделени и на гостите од Бугарија, Диана Стојанова која возеше во класата Е1-2000 и Јасе Николов во Е1-1600, како и на дебитантот од Кочани, Дејан Манасиев.

Во најниската класа А-1150, во која имаше и најголема конкуренција, најбрз беше Георгиј Наков од АКК „ПСС РТ” од Скопје. До крајот на сезоната преостануваат уште кружната трка во Кичево и ридско-брзинскиот натпревар на Витачево кај Кавадарци.