Реприза на финалето од Рио, Норвежанките ќе ја бранат бронзата
Познат е и вториот финалист на женскиот ракометен турнир на Олимписките игри во Токио, тоа е Рускиот олимписки комитет кој го изненади првиот фаворит Норвешка со 27:26 (14:11).
Како и пред пет години во Рио де Жанеиро за златото ќе се борат селекциите на Франција и Русија. Тогаш во бразилскиот град Русинките беа подобри од Франција со 22:18.
Французинките денеска триумфираа над Шведска и втори олимписки игри по ред се наоѓаат во финалната битка во нов обид да дојдат до златниот медал.
Норвешка ќе ја брани бронзата од Рио против Швеѓанките, а има уште една освоена во 2000 година во Сиднеј.
За Русинките на денешниот дуел најефикасна беше Вјахирева со девет голови, а значаен придонес имаше и Седојкина со 11 одбрани.
Кај Норвежанките Лунде се истакна со 14 интервенции, а најрасположена за погодоци беше Мерк (10).