Фудбалерите на Бетис продолжија со солидните изданија на гостински терен, но во дуелот од 12. коло во Ла Лига ремизираа 1:1 против Валенсија, која во финишот успеа да избегне пораз.

Домаќините беа поблиску до водство во првиот дел, но мрежите останаа мирни сè до последната петтина од натпреварот. Во 74. минута Кучо Ернандес сигурно реализираше ситуација еден на еден и му донесе предност на Бетис. Сепак, радоста траеше само осум минути. По корнер во 82. минута, Луис Риоха најдобро се снајде во шеснаесетникот и го постигна израмнувачкиот гол.

Со овој резултат, Бетис се оддалечи од пласман во Лигата на шампионите, бидејќи Атлетико Мадрид има пет бодови повеќе. Валенсија, пак, останува во долниот дел од табелата.

Во ист термин, Мајорка продолжи со добрите партии дома, совладувајќи го Хетафе со 1:0. Единствениот погодок го постигна Ведат Муриќи во 14. минута, доволен за нови три бода и голем повод за славје на Балеарските острови.