Регионалната новинарска платформа која се залага за медиумска слобода и за безбедност на новинарите, „SafeJouralists“, остро го осудува последниот бран ботски напади врз профилите на „Слободен печат“ на Инстаграм, насочени кон подривање на влијанието на нашиот медиум на социјалните мрежи и воопшто.

„Силно ги осудуваме повторените и координирани ботски напади кои целат врз официјалните инстаграм-профили на медиумот „Слободен печат“, од кои последните два се случија минатата недела“, пишува во објавата на платформата.

„Мрежата SafeJournalists го повикува Министерството за внатрешни работи на Северна Македонија и надлежните единици за сајбер-криминал итно да постапат, да спроведат темелна истрага, да го утврдат потеклото на овие напади и да ги санкционираат одговорните. Дополнително, ги повикуваме надлежните институции да развијат системски механизми за заштита на медиумите од дигитални напади, како и да ја зајакнат соработката со меѓународните технолошки компании со цел спречување на вакви злоупотреби. Воедно, ги повикуваме меѓународните организации внимателно да го следат овој случај и да инсистираат на ефикасен институционален одговор и заштита на медиумската слобода во дигиталниот простор“, велат од платформата, во која членуваат новинарските здруженија од десетина балкански земји.

Во рок од неколку минути на 5 април, под неколку објави споделени од профилите @sloboden_pecat и @sp_____magazin беа испратени илјадници лајкови од сомнителни профили, најмногу од странство. Платформата „Мета“, под чиј чадор е „Инстаграм“, не нуди заштита од координирани малициозни напади за јавните бизнис-креатор профили, а со тоа заштитата практично и не постои – освен ако корисникот не го „заклучи“ својот профил.

Нападот продолжи и на 7 април 2026, точно напладне, кога повторно беа нападнати официјалните инстаграм-профили на „Слободен печат“.

Ова не е прв ботски напад кон „Слободен печат“. Координираните атаци започнаа на 6 ноември 2025, потоа на 25 декември, 3 јануари и сега, 5 април 2026. Во оваа непријатна борба поддршка добивме од Здружението на новинари на Македонија (ЗНМ), Самостојниот синдикат на новинари на Македонија (ССНМ), неколку независни медиуми и од нашата лојална публика, која покажа неверојатно разбирање за проблемот со кој се соочуваме.

„Слободен печат“ повторно мета на малициозни ботски напади на Инстаграм