Рецепт за гастрономско уживање од Дијана Иваноска – штрудла со афион
Дијана Иваноска со својот талент за комбинација на вкусови нè носи на едно исклучително гастрономско патување. Иваноска стои зад инстаграм-профилот „Dash of Spice“ и ни ги открива малите тајни за создавање магија од вкусови. Своите рецепти почнала да ги споделува со своите следбеници и пријатели од почетокот на пандемијата.
– Го сакам секој дел од процесот, но најмногу уживам во фотографирањето на храната – ни открива Дијана.
Инвентивната Дијана денеска споделува рецепт за едно уникатно гастрономско уживање – штрудла со афион.
– Прекрасен старински рецепт за штрудла со афион. Многу е вкусна и со фил од ореви и млеко. Оваа количина може да се подели на два дела, две помали штрудли или една голема, како што направив јас овој пат. Коричката е крцкава, а внатрешноста е мека и сочна. Се надевам ќе ја пробате – вели Дијана.
За тестото е потребно:
– 10 г сув квасец
– 170 мл топло млеко
– 1 лажица шеќер
– 150 мл масло
– 170 мл топла вода
– 1/2 лажиче сол
– 650 г брашно
За филот:
– 300 г афион мелен
– 200 г шеќер
– 1 лажица ванила екстракт
– 130-140 мл млеко (врело)
– 30 г путер стопен
– Шеќер во прав за посипување
Подготовка:
* Во еден сад ставете го топлото млеко со квасецот и шеќерот. Промешајте и оставете го квасецот да се активира.
* Во друг сад измешајте го брашното со солта.
* Во подлабок сад ставете ја млаката вода, маслото, смесата со квасецот и со брашното замесете мазно тесто.
* Покријте го со проѕирна фолија и оставете го тестото да стасува околу 30 минути.
* За тоа време подгответе го филот.
Измешајте го афионот со шеќерот и ванилата. Прелијте со врелото млеко и убаво измешајте. Смесата треба да е густа, но да може да се размачкува.
* Ако правите две помали штрудли поделете го тестото на два дела.
Ако правите една, развлечете го тестото во правоаголна форма и нанесете го филот. Завиткајте ролат.
Префрлете го на тава за печење, или во калап за куглоф.
* Премачкајте го ролатот со стопен путер. Покријте го со проѕирна фолија и оставете го да стасува додека се загрее рерната.
*Печете на 180 степени Целзиусови околу 30 минути или додека порумени.
* Откако ќе се излади, малку наросете шеќер во прав.
Уживајте!