Распродадени билетите во секторот за македонски навивачи за дуелот со Украина во Прага
На 14 октомври македонската фудбалска А репрезентација во Прага, Чешка, ќе го игра новиот натпревар од квалификациите за пласман на Европското првенство 2024.
Противник на избраниците на селекторот Благоја Милевски е селекцијата на Украина против која ќе се атакува на победа со која би останале во трката за едно од местата кои водат на континенталниот собир во Германија.
Како што известуваат од Фудбалската федерација на Македонија, билетите во секторот за македонски навивачи на стадионот во Прага за мечот против Украина се продадени.
Вкупниот број на билети кои се наменети за македонските поддржувачи во секторот од трибината на стадионот наменета за навивачи на македонската репрезентација изнесува 988, информираше ФФМ во понеделникот.
Воедно, како што е веќе најавено, Македонците од Виена се организираат да им дадат поддршка на нашите најдобри фудбалери.