Глечер со големина на американскиот град Тампа на Флорида се отцепи и падна на западот на Антартикот. Како што се наведува, научниците ја очекувале оваа појава, бидејќи веќе неколку месеци ги надгледувале двете големи пукнатини на глечерот, пренесува порталот „Вајс“ и додава дека глечерот по отцепувањето од ледениот брег се распаднал на ситни делови.

Таквите појави, како што велат научниците, кога делови од големи глечери се отцепуваат, стануваат се почести.

Европската вселенска агенција воочи две големи пукнатини на тој глечер уште минатата година, а одвојувањето се случило минатиот викенд.

Пред да дојде драстичното затоплување на климата, ваквите појави се случувале еднаш во четири години, а сега се случуваат еднаш годишно, наведуваат научниците.

Се додава дека и делови на Антартикот се загреваат побрзо отколку во остатокот на светот, а научниците на ОН сметаат дека топењето на ледот претставува знак за неповратни климатски промени.

Пајн ајленд, кадешто се случи ова отцепување, е еден од големите глечери кои научниците го проучуваат, а се додава и дека секој ден се очекува глечер двојно поголем од американскиот град Њујорк да се отцепи, бидејќи и на него се забележани пукнатини.