Ракометната репрезентација на Шпанија во дерби натпреварот од второто коло во групата А, во трилер натпревар со 28:27 ја совлада Норвешка. Човек на одлука на натпреварот беше Алеиш Гомез кој во последната секунда го постигна голот од пенал за триумф на „фуријата“.

Најпрецизен во редовите на Шпанија беше Адријан Фигерас со девет гола, додека на голот блескаше Коралес кој имаше 16 одбрани.  Во редовите на Норвешка, најпрецизен беше Магнус Јондал со девет голови. Дерби пресметката помеѓу Шпанија и Норвешка на судеше најдобрата македонска двојка Ѓорѓи Начевски и Славе Николов.

Во групата А, покрај Шпанија, пред пласман во четвртфиналето се наоѓаат и Франција и Данска кои исто така имаат по две победи. Франција предводена од Никола Карабатиќ во второто коло го совлада Бразил со 34:29. Карабатиќ, Гигу и Торнат постигнаа по четири гола за Франција, додека кај Бразил најпрецизен беше Леонардо Дутра со 10 голови.
Олимпискиот шампион Данска со 32:27 го совлада Египет благодарение на деветте гола на Микел Хансен и осумте на Матијас Гидсел.