Рајан Гослинг ќе му се приклучи на филмскиот универзум на „Марвел“ (MCU) како главен лик во новиот филм, објавија од медиумската франшиза. Говорејќи за време на неочекуваната објава во Сан Диего во саботата, Гослинг изјави дека ова е лик што „сакал да го игра многу долго време“, пишува „Би-би-си“.

Филмот треба да излезе во 2028 година и ќе биде трет за антихеројот на мотоцикл. Тој ќе го следи истоимениот филм од 2007 година со Николас Кејџ во главната улога, како и неговото продолжение од 2011 година, „Сеништен возач: Духот на одмаздата“ (Ghost Rider: Spirit of Vengeance).

На посебен настан во рамките на конвенцијата, актерот Рајан Рејнолдс направи неочекувано појавување како ликот на „Марвел“, Дедпул, кој го глумеше во серија филмови.

Овогодишната конвенција донесе голем број новости од „Марвел“ за фановите, вклучувајќи и ексклузивен трејлер што беше прикажан за претстојниот филм „Одмаздници: Судниот ден“ (Avengers: Doomsday), како и најава дека „Црниот Пантер 3“ (Black Panther 3) ќе биде објавен во 2028 година.

Џони Деп имаше специјално појавување, исто како и Рик Моранис кој го најави продолжението на пародичниот филм „Spaceballs“ од 1987 година.

Пред да го открие големото изненадување за приклучувањето на Гослинг кон Марвел, претседателот на „Marvel Studios“, Кевин Фејги, од сцената изјави дека често го прашувале кога Гослинг ќе влезе во универзумот „Марвел“.

Уште во следниот момент, светлата се изгаснаа. Кога повторно се запалија, актерот се појави на сцената со аплаузи и овации од фановите.

Зборувајќи за улогата, Гослинг, кој трипати бил номиниран за Оскар, рече:

„Леле, дали ова навистина се случува?“

Тој и претходно зборуваше за својата желба да ја преземе оваа улога. Гостувајќи во поткастот „Happy Sad Confused“ на Џош Хоровиц во март, ѕвездата потврди дека преговарал со „Марвел“.

Инаку, приказната за овој лик започнува кога тој се поврзува со Духот на одмаздата Заратос, откако склучува зделка со негативецот Мефисто за да му го спаси животот на својот по посвојување татко, со што добива супермоќи.

Филмот ќе го режира Шон Леви, кого Гослинг го опиша како „единствениот“ режисер за овој проект.

Тој ѝ кажа на публиката дека тој и Гослинг минале многу време во паузите на снимањето фантазирајќи за улогата и разменувајќи идеи.

Режисерот изјавил:

„Кога Рајан почна да ми ја раскажува својата визија за овој лик, почнавме да даваме идеи и на крајот му реков: ’брате, ајде да возиме‘, така што дечки, се гледаме во 2028 година“.