Иако имаше постојано водство, македонскиот кошаркарски клуб Пелистер стравуваше за триумфот против Широки до последните секунди, на крајот дојде до минимален триумф од 74:72.

Во доста израмнет меч во кој има битолската екипа имаше предност и од 13 поени во последниот период, остана присебен по серијата од 12:0 на противничката екипа и стигна до заслужен триумф, прв во новата сезона во АБА 2 лигата.

Во салата „Боро Чурлевски“ постојана предност имаа играчите на тренерот Александар Петровиќ. На полувремето беа во позитива од четири поени (37:33), а на истекот на третиот предност од „плус пет“ (55:50).

А одлично го отворија оној последен период кошаркарите на Пелистер. Со серијата од 6:0 стигнаа и до двоцифрена позитива (61:50). За во средината на таа последна четвртина да имаат и уште повисоки 67:54.

Но, гостите успеаја да се вратат со своја серија од 12 неодбранети поени, доволно да се доближат на само еден поен негатива (66:67). Серијата ја прекина Антоан, за 69:66. Но, беше извесно дека последните две минути од мечот во Битола ќе бидат драматични.

Истиот играч погоди уште еднаш за Пелистер да се одвои на четири поени (71:67). А многу среќа имаше Мишковиќ во неговиот обид вреден три поени, кој се чини беше и пресудниот момент од претпоследната минута од играта.

Токму двоецот Антоан-Мишковиќ беше „добитната комбинација“ за Пелистер на оваа средба. Беа „двоцифрени“ (искомбинираа 29 поени, а свои поентерски мигови имаа и Бојиќ (девет реализации), но и Стајиќ, Костоски и Едвардс (додадоа по осум).

Во наредното, второ, коло од групата „Ц“, на 15 октомври, „зелено-белите“ гостуваат во Подгорица, каде ги чека дуелот против истоимената екипа.