Две угинати птици, еден црн и еден бел мршојадец, кои се класифицирани како редок и заштитен вид во Македонија, биле пронајдени вчера во кавадаречкиот регион.

Според официјалните информации од Секторот за внатрешни работи – Велес, случајот бил пријавен вчера во 11:25 часот во ОВР – Кавадарци од претставник на Македонското еколошко друштво (МЕД). Птиците биле лоцирани во атарот на кавадаречкото село Гарниково.

Веднаш по пријавата, на терен излегла увидна екипа од ОВР – Кавадарци. Поради расчистување на случајот и утврдување на точните причини за угинувањето, спроведена е координирана акција во која се вклучиле и државен инспектор за животна средина, претставник од Агенцијата за храна и ветеринарство, како и претставници од МЕД.

Угинатите птици се пренесени на Факултетот за ветеринарна медицина при УКИМ, Скопје на понатамошни лабораториски анализи за утврдување на можни причини за угинувањето, затоа што постојат сомнежи за труење. Во близина на угинатите птици била пронајдена и угината крава.

Настанот е пријавен од страна на Бугарското друштво за заштита на птиците до Македонското еколошко друштво-МЕД утрото на 21.2 по континуиран мониторинг преку GPS локатор на мршојадците и сигнализација за можно угинување на еден1 мршојадец, за по пристигнувањето на теренот да се утврди дека станува збор за два угинати мршојадци, угината крава во фаза на отелување и неколку кучиња кои јаделе од месото на кравата, соопштија од ДИЖС.