Пролет се раздели со Андон Бошковски
Андон Бошковски од денеска повеќе не е тренер на Пролет. Раководството на Пролет по поразот од Металург одлучи да ја прекине соработката со Бошковски.
Андон Бошковски пред почетокот на сезоната ја презеде екипата на Пролет, доаѓајќи на местото на Зоран Кастратовиќ кој минатата сезона го освои третото место.
Но, лошите резултати сезонава, екипата по 12 кола има учинок од седум победи и пет порази како и трите порази по ред, беа причина за разделба на Пролет со Бошковски.
„Ракометниот клуб Тинекс Пролет ја информира јавноста дека спогодбено ја прекинува соработката со шефот на стручниот штаб на првата екипа, Андон Бошковски. Причина за ваквиот потег е серијата слаби игри што кулминираше со трите порази во низа во Супер-лигата. На последниот состанок одржан во текот на денешниот ден заеднички со тренерот одлучивме дека најдобро за клубот е да ја прекинеме соработката. Тинекс Пролет му се заблагодарува на Бошковски за сработеното во изминатиот период и му посакува многу среќа во идните ангажмани“, објави Пролет на официјалната интернет страница.