Проф. Бојаџиева го критикува договорот меѓу власта и производителите на храна: Нема џентлменски договори во пазарна економија
Професорката Даниела Бојаџиева од Универзитетот „Св. Кирил и Методиј“, во гостување во емисијата „Економски Магазин“ на „Алсат“, упати забелешка за таканаречениот „џентлменски договор“ кој власта го склучи со компаниите за производство на храна, кој предвидуваше фирмите коишто ќе добијат субвенционирана струја, да ги намалат цените на основните хранителни производи.
Овој договор не беше испочитуван од производителите од прехранбената индустрија, по што Владата се одлучи да донесе одлука за замрзнување на цената на лебот, а најави и замрзнување на цените на други прехранбени производи.
„Во пазарна економија нема џентлменски договори. Ако донесеме одредена мерка, да ја субвенционираме електричната енергија за производителите, треба да кажеме кои производители, во колкав период ќе трае таа субвенција, кој ќе биде износот, по кој критериум ќе се доделува. Јас немам информации за овие прашања, а нема ни јавноста“, вели професорката Бојаџиева.